السلام عليكم
بهذا التقرير راح أشرحلكم بشكل مختصر ومفهوم عن موضوع الانتباه، واللي يعتبر من المواضيع الأساسية بمادة علم النفس التربوي، خاصة لطلاب المرحلة الثانية. حاولت أكتبه بأسلوبي وبطريقة بسيطة حتى يكون واضح وسهل لأي طالب يحب يستخدمه أو يعدّله.
شنو يعني الانتباه؟
الانتباه هو شلون نركز على شي محدد ونخلي بقية الأشياء على جنب، يعني مثلاً إذا گعدت تقرأ كتاب، وگدرت تتجاهل صوت التلفزيون، فإنت سويت عملية انتباه.
بعض العلماء مثل "ماكدوجال" گالوا إن الانتباه هو اللي يحدد سلوك الإنسان، يعني على شنو يركز راح يكون تصرفه حسبه.
أنواع الانتباه
الانتباه مو نوع واحد، لا، أكو 3 أنواع رئيسية:
الانتباه القسري: يصير غصب، مثل لما تسمع صوت عالي فجأة، حتى لو مو مهتم، راح تركز عليه.
الانتباه التلقائي: يصير لأن الشي يعجبك أو تهتم بيه، بدون جهد، مثل انتباهك للعبة تحبها أو موضوع تحبه.
الانتباه الإرادي: وهذا نستخدمه لما ندرس، نسمع محاضرة، أو نحاول نركز رغم إنه الشي مو ممتع.
شنو الأشياء اللي تأثر على الانتباه؟
أكو عوامل خارجية وداخلية:
العوامل الخارجية:
شدة الصوت أو الضوء: كلما كان أقوى، يشد الانتباه أكثر.
الحركة: الشي المتحرك يشد الانتباه أكثر من الثابت.
الاختلاف: مثل نقطة حمراء بنص صفحة بيضة.
الحجم: الشي الكبير يلفت الانتباه.
الشي الجديد: أي شي جديد نشوفه لأول مرة يجذب انتباهنا.
العوامل الداخلية:
الحاجة: مثل الجوع، فالجائع راح يركز على الأكل أكثر.
الميول والرغبات: إذا تحب الرسم، راح تنتبه لكل شي له علاقة بالرسم.
التهيؤ الذهني: إذا ناوي تشتري تليفون، راح تلاحظ إعلاناته بكل مكان.
شنو اللي يشتت الانتباه؟
أكو أمور هواي تخرب التركيز، مثل:
التعب وقلة النوم
القلق أو التفكير بأشياء ثانية
مشاكل البيت أو الوضع المادي
الإضاءة التعبانة أو الأصوات العالية
خلاصة الكلام
الانتباه مو بس شي بسيط، هو مفتاح الفهم والدراسة. إذا عرفت شلون تتحكم بانتباهك، راح تلاحظ فرق كبير بأداءك سواء بالقراءة أو بالمذاكرة. حاول تبعد كل شي يشتت انتباهك، وخلي الجو مناسب حتى تركز.
لقد تم رفع ملفات عن علم النفس تقارير عن علم التفس بالنمو والانتباه
لتحميل التقرير بشكل وورد او pdf